【遊戲感想】《人中北斗》大量大眾臉 VS 桐生拳四郎 Lost in Eden

大家有無玩到《人中北斗》?正如我喺《北斗 Demo 試玩感想》一文中所講,我本來對《北斗神拳》的故事和風格都幾苦手,而我都幾相信好多《北斗》玩家同我一樣,都係因為遊戲打住「沿用《人龍》系統」嘅旗號,先會有咁大動力去玩呢隻遊戲。

咁,玩完啦,問心,你問我好無玩嘅話……不如我逐步逐步同大家分享。

我唔係《北斗》Fans,佢嘅世界觀我當然共鳴唔大,見到某啲角色出場亦唔會特別興奮開心,所以玩呢個遊戲,我嘅著眼點主要會係喺遊戲性同埋戰鬥方面。

除咗佢。見到佢我好開心,因為佢係《北斗》入面嘅真島吾朗 LOL

遊戲主線劇情……唔知 Fans 點諗,不過呢個遊戲嘅故事真係幾大男人向的,喺故事入面嘅女人都好弱、好易比人帶走綁架欺負、比男人搶黎搶去咁,陰公,千祈唔好比啲女權份子見到呢個遊戲呀,如果唔係一陣人地又投訴架啦。

簡單黎講,《北斗》就係一個「不斷變強去挑戰更強敵人」的故事,你要我形容得中二啲,我當然會話佢係「漢子的浪漫」「熱血的情與義」之類嘅故事啦(笑)

修行 Play

戰鬥方面係好玩架,真係講拳腳功夫,無得好似《人龍》咁買把機關槍或者無銘刀去屈人(喂);而拳四郎每一招都係漫畫入面出現過嘅招數,所以 Fans 應該會「嘩嘩嘩」咁樣好開心(笑)

不過,無論係 Boss 戰或者雜魚戰,戰鬥入面只要你出「秘穴奧義」嘅話,就會面對唔同速度嘅 QTE,都咪話唔攰……雖然打雜魚時,啲 QTE 中唔中都無所謂(反正中咗秘穴都應該死的了),不過,喂呀,打開機嘅,見到有制要撳就會撳架啦,所以我好乖咁全部 QTE 做足哂架 LOL

不過雜魚戰打得多都幾悶,咁一來《北斗》入面啲雜魚就明顯飽受核爆後世界末嘅遺害(好似係)所以個個勁樣衰,真係樣衰到見佢一鑊想打佢一鑊;但係都唔駛黎得咁密架!《人龍》都話會喺 Mini Map 上面將敵人顯示為紅點,等你有得避吖……

但係今次「伊甸」嘅地圖比我想像中細,亦無咩橫街窄巷,所以好多時遇到雜魚敵人都係打埋佢算罷啦。係啊,係可以裝備「隱身衣裝」避開雜魚,不過有時又驚會唔會減少咗接支線嘅機會,所以我去到好後期清哂大部份支線先著件「隱身」orz

打雜魚嘅唯一樂趣係練下啲技

地圖唔大嘅另一影響係,可以入去玩嘅地方唔多,機舖要自己出荒野搵 Arcade 機台呢個設定係幾有趣的,不過餐廳得三間真係好可惜,我原本以為可以喺《北斗》世界入面展開王的盛宴狂食世紀末食物架嘛(笑)

不過世紀末的食物名字是走獵奇風格的,嗯……

雖然拎《人龍》黎同《北斗》做比較就唔係咁公平……不過,唔知大家覺唔覺,遊戲開頭都還好,但係入咗伊甸之後,拳四郎真係越黎越有桐生嘅味道,講嘢口吻或者反應都令我有「根本係桐生 Cosplay 緊拳四郎」嘅感覺 orz

不過似《人龍》嘅都係拳四郎一個人啫,遊戲系統方面就點都有落差的,雖然話《北斗》都係用人龍系統,但係我諗「人龍 Studio」其實係咪好早期已經整緊呢隻遊戲嘅呢?因為《北斗》並唔係採用無縫地圖的,進入店舖就要好似舊版《人龍》咁要 Loading Time~

如果用無縫地圖,感覺會無咁古早(笑)

同埋遊戲今次要好似以前要 Save Point 黎進行儲存,嗯……以前就搵電話亭,《北斗》嘅社會就主張人力就是資源(好似係),搵個人企喺度比你儲存 LOL

打呢份工都幾慘 T__T

至於地圖上店舖少,可能正正係代表緊《北斗》荒涼嘅世界觀吧?無錢咪無人開舖囉 LOL 不過攻略遊戲時,我最懷念嘅絕對係《人龍》入面嘅的士,去到遊戲後期就會好唔想自己行了(笑)

至於《北斗》獨有嘅荒野&揸車 Play,嗯,由我黎講應該唔太公道,因為我本來對車嘅遊戲元素興趣不大(當年嘅 Watch Dog 應該係我最樂意飛車嘅遊戲了(喂))

不過《北斗》入面玩車嘅部份係一個好大嘅坑,好長嘅支線,又要砌靚部車,又要諗下啲配件適合咩賽事或者行咩區域;而收集素材去修復零件亦都係一條漫漫長路…(遠目)係呀,素材可以買呀,但係遊戲入面啲錢都用得幾快,世紀末物價高昂,生活艱苦~

荒野版棒球支線:打飛車黨

Everybody 發窮惡 in Eden(不過呢個對白……)

有心嘅朋友可能會煲鬥技場,鬥技場啲點數,可以換到好多實用嘅配件同道具;不過「囚犯鬥技」一打就打三場,場場都多人到爆,得罪講句,其實都幾悶的(小聲)

所以……我就未有時間同心機衝哂成個鬥技場住啦,各位加油。

小遊戲方面,今次嘅水商售「少爺拳四郎」都真係幾重口味,《人龍》有紅髮長氣阿嬸,《北斗》有肌肉型古早味女子,真係同性感兩個字扯唔上關係 orz

不過玩法就單一少少啦,拎肉乾幫啲女女升 Level,然後落場接客,僅此而已;無得好似《人龍》咁幫女女打扮從而轉技能或者屬性,亦無咗比賽嘅元素,啲女又…唔係咁靚(我用字好厚道!),同埋今次玩夜總會係幫拳四郎還債居多,嗯……我覺得麻麻地~可能主因係無咗真島做旁白!(笑)

至於遊戲推出前嘅「酒保拳」仲有「醫生拳」兩條支線,一開始玩係幾開心的,「酒保」支線仲可以同伊甸各店主刷好感度,好感度爆滿去幫襯佢地會解鎖  Shopping List 同埋平少少,呢一點我覺得幾有心思~

不過玩酒保支線時,隻手會好攰…

至於診療所「醫生拳」玩頭兩次時我好有驚喜的,一入到去聽到 後現代Remix 版貝多芬嘅《快樂頌》我真係心諗「做乜勁」咁笑咗好耐!呢個遊戲真係充滿 SEGA 特色架,嚴格黎講係《人龍》唱卡啦 OK 遊戲嘅變奏版,但係玩法根本係《初音 Project Diva》簡易版黎嘅 LOL

不過要玩到 Full Combo 都幾煩 orz

綜觀黎睇的話,《北斗》唔係唔好玩,但係梗係覺得有好多地方留咗力、似乎仲有好多進步空間咁。不過,問心,我其實比較希望「人龍 Studio」做返自己嘅故事同劇本,就算唔係《人龍》系列都唔緊要,即係例如《真島傳》我已經唔會再期待了orz

老老實實我覺得《北斗》出一集其實都好夠了,唔知下個作品會係咩呢?

About 神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

Connect

Connect on Facebook View all Posts