留返個死剩種打靶仔真係咁難咩

有玩過全境封鎖都應該打過林肯隧道檢查點依個任務。無論普通困難抑或挑戰模式,都一定見過或者聽過人地講:「Leave one stand!」或者「Don’t kill all of them! Leave one alive.」意思大概係叫你留番個死剩種。

全境封鎖多漏洞,時常斷線嘅問題,就毋須我多講。林肯隧道去到水閘拆彈嗰關,就係限時防守關嚟。只要你一殺哂眼前批人仔,就會有另一批人仔衝落嚟,殺極都有。不過依一關有個機制,就係殺剩一個打靶仔,就唔會有另一批人仔落嚟。咁就可以輕輕鬆鬆等夠鐘,過依一關。

但十次有八次偏偏有個豬隊友,心血來潮,專登殺死個死剩種。咁樣就要幫佢執手尾,解決多一批人仔。你手痕唔係問題,最多咪射下車窗,射下鐵閘,大不了就射落隊友塊面。最慘係個豬隊友又唔可以單挑哂成批人仔,又要你走出去幫佢復活。正一阿茂整餅,冇嗰樣整嗰樣,搵嘢嚟搞。

乜堅持嗰幾分鐘好難咩?咁都忍唔住射死隻怪。知道自己早洩就行遠少少,冇人怪你架喎。知道自己皮脆肉嫩就唔好咁多手啦,做人起碼有自知之明。正所謂「人靠衣裝,佛靠金裝」,你唔係全身金裝就唔好充大頭鬼,衝出去做烈士,係冇人可憐架。死左就要搵人幫你執屍你話幾麻煩呢。

我曾經遇過一次就係隊友懶醒,倒數五秒殺死咗隻怪。原本以為相安無事,個智能系統又冇提醒話有敵人嚟緊。點知去到防火門嗰度發覺未開。咁大家唯有眾志成城,翻轉頭闔家殺清光,先去到下一關。真係多得豬隊友唔少,好心醒少少,就唔使俾人藐。

玩得全境封鎖都知道,全世界共用一個伺服器,共冶一爐,就預咗萬國語言通街走。識英文嘅大概溝通無礙,唔識英文咪用中文問囉,都好大機會有人答到你。如果仲係冇人答,咪上網查或者查字典囉。又唔係講拉丁文或者希臘文,一定搵到答案喎。更何況網上百幾個免費攻略任你睇,實有一個方便又啱用,唔使左砌右砌先搵到。

講到最後,祝大家一行四人解任務得心應手唔會死,入暗區都可以打鑊金(金裝咋)。

About 植樹林

姓林,名植樹。瀕危物種程式猿,喜好楊柳。

Connect

View all Posts