痴線獨立遊戲發行商TinyBuild宣布 將會有六款遊戲登錄 Switch!

成日發行埋啲痴線獨立遊戲既 TinyBuild 係琴日舉行咗「HelloSwitch」既發布會,佢地宣布係今年內將會為 Nintendo Switch 帶黎六隻獨立遊戲,當中有三隻 Game 會係 Switch 上面出現直頭係出乎意料之外,立即同大家分享!

《The Final Station》

大家仲記唔記得早二年套《屍殺列車》,基本上呢隻遊戲可以視之為佢既遊戲版。由獨立製作團隊Do My Best 研發,遊戲背景其他同電影都好相似,都係搭緊架車既時候話比你聽個目的地已經 GG,而玩家就係沿途係唔同地方尋求資源。當然係你出去搵資源既時候就有大量喪屍出黎搞你啦!

同時遊戲目標係希望玩家盡量用火車帶走仲未受到感染既人離開,但係有時班友係阻手阻腳,係呢個時候你要保護佢定係由佢自生自滅就睇閣下既決定啦!

《The Final Station》將會係本月推出,包含之前 Xbox One/ PS4 / Steam 全DLC,售價為 USD $15。

 

《Clustertruck》

由 Landfall Games 制作既第一身視點 Parkour 遊戲,遊戲玩法非常簡單,就係係貨車上面跳黎跳去,跳到去終點就 OK,當然係中途失足跌落地就會比後面d貨車輾死啦,充滿教育意義。

《Clustertruck》將會係三月推出,之前曾經有 Xbox One/ PS4 / Steam 版本,售價為 USD $15。

 

《Punch Club》

簡單黎講其實係一款育成小品遊戲,遊戲目標就係要玩家培育主角由排骨仔變到六叔/泰臣咁好揪。當然遊戲前期為咗應付生計仲要去打工賺錢同訓練能力咁啦,不過注意遊戲既戰鬥係交晒比交給主角發揮,你可以做既只係事前排好技能咁,所以運氣差既時候仲會打輸比自己屎既人……。

《Punch Club》將會係五月推出,之前曾經有 Xbox One/ PS4 / Steam / Android / iOS 版本,售價為 USD $15。

 

《Party Hard》

重點遊戲之一!大家有無試過隔離屋或者樓上樓下開 Party 搞到你心煩氣燥呢?呢隻遊戲玩家就係扮演頂唔順呢d Party 而決定殺咗個鄰居既殺手,同時亦都要避免驚動警察而比人拉,形式比較接近係策略遊戲。

遊戲設有多種細緻技巧,例如擺個 Pizza 就會吸引到一堆人聚集咁,當然玩家亦可以先潛入房間搵有利位置,再等待目標出現下殺手,但係殺完人記得搬條屍去收埋,如果唔係比人見到屍體就會報警,然後你咪比人拉囉……。

《Party Hard》將會係今年夏季推出,之前曾經有 Xbox One/ PS4 / Steam / Android / iOS 版本,售價為 USD $15。

 

《Streets of Rogue》

重點遊戲之一!基本上呢隻遊戲可以話係平面版 GTA,自由度極高。 遊戲內玩家將會扮演一名流氓並完成殺人、偷野、起字頭等等任務。作為開放式遊戲,玩家可以用多種方式完成任務,你可以齋玩潛行唔殺人又得,瘋狂無雙又得,而且係《Streets of Rogue》入面因應唔同既方法係連地圖都可以移為平地,食埋巨大化藥的話甚至可以穿過地圖係個邊度跌落去下一層!

另外遊戲有極豐富技能及等級系統,除咗有多達廿種職業選擇之外仲會有埋佢專屬既職業技能,例如「警察」就會有「手扣」技能,可以瞬間制服不法分子,並且地圖內所有警察都會成為你既同伴,但係如果殺害平民的話就會受到一定程度懲罰。

《Streets of Rogue》將會係今年下旬推出,之前曾經有 Steam 版本,售價為 USD $15。

 

《Hello Neighbor》

今次最重點遊戲!大家仲記唔記得我地之前介紹過一隻恐怖遊戲,故事講玩家附近黎咗個新鄰居,呢個鄰居好古怪,屋企有個地下室被重重封鎖,玩家要潛入呢個神秘鄰居屋企,解開呢個地下室之謎,但係負責守住自己屋企個怪大叔會跟據玩家行為變化而進行相對應策,詳情可以睇呢度

《Hello Neighbor》將會係今年內推出,之前只係有 Xbox One 同埋 Steam 版本,所以今次非常值得留意!售價為 USD $40。

 

About 森麻

VJGamer總編 (毒撚),歡迎投稿

Connect

Connect on Facebook View all Posts