【試玩報告】《One Piece World Seeker》首隻海賊王開放世界遊戲

之前我地都有報導過既首隻海賊王開放世界遊戲《One Piece World Seeker》,消息一出廣大既 OP Fans 都非常之開心,之但係實際玩起黎又係點呢?今日我地係 C3AFA HK 入面終於試到呢隻遊戲啦,立即同大家黎個簡單介紹!

 

未正式試 Game 之前就梗係睇下個操作方法先啦!

場內只有2部,想試玩就建議早d去啦

 

之前睇片見得最多既就係路飛橡膠手飛黎飛去趕路,使用方法好簡單,望住高位有綠色準星既地方再撳實 R1 就得!

 

 

遊戲開始之後係一貫既基本操作介紹,無乜特別。然後好快就進入第一個城鎮,同好多 RPG 相似,都係去附近接下任幫人解決問題咁。

 

中級既任務就係要你去打倒一班佔領緊港口既海賊(呢啲野唔係應該海軍做架咩?),同時會教你一啲基本既戰鬥操作,有遠攻有近戰,不過提醒大家一點呢隻遊戲並非無雙操作方式

一般遠攻操作介紹,甚至有爆頭設定,只要你瞄得準一樣可以秒殺卒仔

當然唔少得既就係充滿逼力既必殺技啦

 

咁講返個任務,由於呢個任務係需要你不被敵人發現係清場,所以必需使用「見聞色」霸氣,只要撳住 L1 + 正方就可以使用。順帶一提《World Seeker》一開始已經係新世界版路飛,唔洗再由頭學過二檔三檔。

發動「見聞色」霸氣之後就可以有透視眼以及睇到敵人行走既路徑

最直接既方式當然係走去敵人後面玩暗殺啦

鍾意遠攻既亦得,不過瞄準真係有啲難度……

 

係呢度亦都簡單講解下遊戲遇敵系統,同《刺客信條》系列相似,敵人會有一定既索敵範圍,當敵方發現有異動既時候就會出現黃色以及紅色狀態。黃色狀態係屬於懷疑狀態,呢個時候搵地方避下風頭就ok,而且仲有蛇叔紙皮箱咁上下既野,不過路飛係用酒桶咁解。至於紅色狀態就係已經發現咗你,呢個時候就一係戰一係逃吧。

呢幅圖就見到晒二種狀態啦

紅色狀態就打爆佢吧!

比人追果陣可以搵呢類酒桶

成件事係咪好熟口面……

 

完成咗港口任務之後我地試埋高難度任務,今次就唔洗偷偷摸摸啦,任務要求你殺入去海軍基地入面拖延時間,大家係呢度將會見到第一個敵方 Boss「煙佬」以及打極都打唔完既小兵。

小兵係打極唔完的

槍兵之外仲會有盾兵

橡膠火箭炮指拎係 ↓+正方

第一隻Boss「煙佬」

打到無血諗住去搵補品啦……點知啲箱係打唔爛架!

 

最後一提既係現時仲開放埋「武裝色」霸氣,發動之後會增加攻防以及會多咗2招必殺技,左下角血條下就係必殺技 Bar,最少要有1粒珠先可以出到火拳統的,試玩既朋友記得留意啦!

發動之後隻手會變咗黑色,還完度甚高!

 

《One Piece World Seeker》預定 2018年發售,對應平台為 PS4,不過由 2月9日至11日會係會展「C3AFA HK 2018」入面試玩到,把握機會阿!

 

About 森麻

VJGamer總編 (毒撚),歡迎投稿

Connect

Connect on Facebook View all Posts