【新作試玩介紹】《Dragon Crown Pro 魔龍寶冠 Pro》經得起時間考驗之優秀作品

《Dragon Crown Pro 魔龍寶冠 Pro》乃係之前係 PS3 / PSV 上面推出既《Dragon Crown 魔龍寶冠》加強版,當時作品推出後大獲各方好評,有玩過既都會知道係正野黎。不過對於未接觸過既玩家黎講,屬於近年少見既 2D橫向動作遊戲有咩咁吸引呢?

 

先講一講佢既班底,係由製作《Princess Crown 公主之冕》(我最喜愛既2D動作遊戲)、《Odin Sphere 奧丁領域》、《朧村正》知名團隊「香草社」 Vanillaware 擔綱製作,屬於2D橫向動作 RPG 遊戲 。

遊戲開始後玩家會出現係城鎮入面,係呢度可以承接各種委託以及整理裝備,然後大家仲會初次見到極細緻既 2D 手繪風格畫面,不過老實講淨係呢啲野又點足以令佢成為大獲好評既作品,真正出色既地方應歸功於遊戲系統。

其實d畫面真係好靚,細節位做得一絲不苟

 

玩家可以選擇六大職業,各有自己技能同招式,不論任何角色都繼承咗《朧村正》等遊戲既極致爽快感,例如下正方剷接近,然後正方 x2 再接上正方浮空連 Air Combo 咁,基本上研究角色連招都可以玩一排。而且招式設定亦都非常細膩,例如用亞馬遜女戰士使用飛斧招式之後係要自己過去執返把斧頭先可以再用,係無斧頭既情況下就淨係可以打拳腳交咁。

六位角色個個都唔同玩法,成長數值亦各異

部份怪物可以騎乘

地下城會執到死去既冒險者骸骨

返城後拎去教堂就可以復活並且邀請佢加入你隊伍

仲會有自己既LV及裝備

 

遊戲亦有升 LV 及刷裝系統,每次進入地下城都可以透過打開寶箱去收集裝備,而且完成關卡之後仲會得到相應既報酬以及經驗值。藉住角色成長就可以學到各種專我屬技能去豐富你既連招,當然刷到靚裝去打高 LV 地下城迷宮就更舒服啦!

裝備係隨機生成,成班朋友一齊刷裝都幾開心

完關卡後會因應表現而獲得相應既報酬同經驗值

透過升及或者完成委託就會有技能點學新招

 

另外地下城仲有隱藏路徑,部份隱藏路徑可以用場地物件破壞然後就可以進入。另一種隱藏路徑就要用遊戲中期出現既符文系統,透過唔同既組合生成密碼黎打開,如果唔睇攻略的話淨係砌符文同解密碼都有排你玩……

好似呢幅石牆咁,本身係入唔到的

打敗場中既哥布林後就可以用佢地既炸彈炸開幅牆,出現隱藏路徑

 

當然遊戲每個關卡都設計得極有心思,除咗上面講過既隱藏要素之外,每關既 BOSS 都有自己獨特既設計,例如去到呢關要救返班村民之後要一直保護佢地,但係呢關既 BOSS 係吸血鬼黎,如果你保護不力令到班村民力盡的話佢地都會變埋吸血鬼!

呢關要保護村民

呢關 Boss 就係一堆有神燈既賊,只要擊倒拎住神燈果隻賊就可以搶過黎用

 

今次既《Dragon Crown Pro 魔龍寶冠 Pro》將畫質提升到 4K 解析度,畫面上面已經無得輸(我之前玩PSV版感受更深),另外連遊戲配樂都重新錄製,新版本可以選擇管弦樂團現場演奏重新錄製版,當然遊戲原版本總數六個 DLC 亦都收錄晒。另外遊戲係支援 PS3、PS Vita 三平台跨機連線遊玩!

完成部份委託會解鎖圖片,完全展示緊超細緻畫功同4K威力

幅幅圖都靚到裂

 

遊戲最大支援 4人同時連線遊玩,即使只係得一個人都可以透過酒館去招募 AI 操作既隊友,當然大前提係你係地下城執骨復活咗佢先得啦,遊戲已於 2月8日正式上市,對應版本為 PS4。

About 森麻

VJGamer總編 (毒撚),歡迎投稿

Connect

Connect on Facebook View all Posts