【新手MHW獵人日記】最終章:「打完冥燈又如何,而家先係遊戲嘅開始……」

爆鱗轟炸機場場都亂入,做龍做到你咁 Attention Seeking 真係 Not so good

黎到第三章獵人日記(亦都係最後一章了),我嘅感覺就係:基本上由滅盡龍開始,一係就 Solo,一係就搵隊友打齊刷裝,如果唔係,都係咪鬼射救難,網友到底知唔知咩叫「救難」?係搵你幫拖呀,唔係搵你入黎增加死亡風險呀,呢樣嘢真係講咗十次都要再講多一次!

先爆兩角再斬你尾仔,滅盡龍 BB 對唔住啊

講起麥浚龍……我意思係滅盡龍,我發現有唔少朋友都著緊滅盡龍裝,咁當然一來滅盡BB 唔難打啦,不過我亦都發現有好多朋友同我之前一樣,整咗套裝出黎,但係技能原來唔適合自己用的,去到上位之後,去研究每套裝嘅屬性同技能真係一門學問啊(遠目)雖然我貪靚,但因為我獵人嘅實力唔容許我做外貌協會,所以……

所以炎王 I Need You!! LOL

三條古龍入面最好玩嘅我覺得係炎王,雖然個場成日蒼火+爆鱗+爆鎚亂入,但係打炎王對我黎講算係最有挑戰性的,而且我枝重弩去到 Rare 7~8 都需要炎王及冥燈素材,於是呢幾晚基本上都係炎王 Play,玩火取暖癒身心!

成個場都係其他龍嘅痕跡,至於條炎王唔知幾時混戰中過咗區了orz

另外呢,我想問呢……
係咪得我一個人先覺得炎王第一次出場時個動畫,佢好似HSBC 隻獅子啊 LOL

而且係紅衫魚色啊 LOL

至於另外兩條古龍,屍套龍我係三條中最早打的,因為我遠攻,所以佢啲口臭 Laser 同埋沼氣攻擊唔算好影響到我,最多要射龍擊砲時先發個松明彈換下氣,所以對我黎講唔算好難打的。不過,都係嗰句啦,次次一打親屍套龍我就鼻敏感,所以如無必要我都唔想特登去打佢,臭臭龍哼哼~

鋼龍 BB 就得個煩字,出場畫面好 Bling Bling 好靚啊,但係成日整啲龍捲風啊氣流啊出黎,真係好煩,而且我對佢無咩好嘅回憶,因為第二次打佢時,我同個朋友講「呢條友有無咁鍾意周杰倫啊?係咁出龍捲風」時,因為個 gag 太爛所以無人理我,我覺得很挫敗,所以我討厭鋼龍~LOL

打哂三條古龍,馬上就黎到遊戲中(所謂嘅)Boss 冥燈龍了。點解我話係「所謂嘅」……打咗冥燈嘅朋友應該明白我嘅講法,因為冥燈真係好易打,噴米加粒子砲(?)前,冥燈個口會有光球,光球出完幾秒先會射 Laser,咁樣基本上係比哂時間你去避,如果咁都比佢噴死嘅我真係對唔住自己隻貓茶茶(我現實中其中一隻貓都真係叫茶茶 LOL)

呢隻冥燈好鬼似啲哈爾濱冰雕

諗返起 1月26日出 Game 當晚,我係一個連打大兇豺狼都會貓車嘅垃圾廢柴,然後黎到 2月7日,即係我打完冥燈龍嘅當晚,我先發覺我因為《MHW》呢個遊戲而犧牲咗好多休息同埋工作嘅時間(喂)

但係值唔值得?值得,梗係值得。

個 texture 目測好黏手…

因為正如我第一篇獵人日記所講,我終於明白機友們打 MH 或者講起 MH 時眉飛色舞嘅樂趣喺邊度、明白晚晚約戰嘅親切同埋默契係啲乜嘢;而最難得嘅係,我諗我唔再係一隻菠蘿雞了,相反,喺遊戲推出無耐,我成功毒到身邊兩位女性朋友走去買 PS4 黎同我打《MHW》,由以前比人 Carry,去到 Carry 朋友打上位,呢種,算唔算係我嘅成長呢?

Boss 打完了,HR解放了,然後,仲有好多種任務未做,麒麟未打,蒼紅亂麻我未打,好多套裝想做,想試新武器。我叫打爆機了嗎?按主線黎講,或者係嘅。

但係,遊戲,而家先真正開始。

不過喺大家睇到呢篇日記嘅時候,我已經收到任務係要去寫《真三國無雙八》了,所以或者要暫停獵人生涯、愛護動物一陣。

但係,寫呢三篇日記令我收到唔少讀者短訊或者留言表示有共鳴或同感,喺呢一度容許神婆向大家再次合十感謝,感謝大家睇哂三篇日記,感謝大家見證分享我第一次嘅獵人生涯。

嗚,我而家都好想放工返屋企屠龍 orz

前文回顧:新手獵人日記第一章
前文回顧:新手獵人日記第二章

About 神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

Connect

Connect on Facebook View all Posts