【大聲喊出招式名】《SAO》桐人「闡釋者」準備推出1:1實體化周邊!

由《刀劍神域(SAO)》連載開始,呢套作品就紅足咁多年,時至今日《SAO》都仲係各大 Cosplayer 嘅熱門選擇作品!講起 Cosplay,大家應該對「18 桐人」呢類圖有啲印象?(笑)

無論你係 Cosplayer 也好、係《SAO》系列忠實 Fans 又好、甚至只係刀刀劍劍嘅周邊愛好者都好!日本 Cerevo 會社同角川合作,正式推出 1:1 大小嘅「闡釋者」--無錯!就係桐人嗰把「闡釋者」!

 

呢把 1:1 嘅「エリュシデータ(ELUCIDATOR)」預計 2018 年夏天推出,售價目前未確定,根據台灣角川公佈嘅資料,估價約為 6~9萬日元左右。「闡釋者」劍身以 LED 製作,內置唔同嘅揮劍動作嘅音效;最神奇嘅地方係呢把劍有「聲音辦識功能」,只要玩家喊出桐人嘅招式名,把劍就會配合嗰個招式而出現相應嘅光芒同音效,真係型到……我都好想買一把!

最 Cyber 嘅地方係,呢把劍仲有一個對應嘅電話 App,只要有 wifi,就可以連動電話同埋把劍去調整音量、光度、語言等等嘅個人化要素。如果大家細心留意下圖,或者仲會覺得呢個 App 嘅界面好有親切感!有玩過《SAO》嘅朋友,一定認得啲圖示同字體,同遊戲入面係一樣架(笑)!

Cerevo 公司仲表示,佢地開發嘅「BLADEM(connected BLAde Development and Evalution Module)」系統,今次嘅「闡釋者」只係佢地第一個合作對象;照佢地咁講,唔通下次仲會有其他作品嘅武器實體化呈現?

比大家睇下實物影片先啦:

About 神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

Connect

Connect on Facebook View all Posts