【初心遊玩感想】《魔界戰記 5》Switch 版中文化!相比 PS4 版有咩優點?

2015 年由 日本一會社 推出嘅戰棋遊戲《魔界戰記 5》,喺 2017 年登錄埋 Switch;而 Switch 中文化版本亦都係日前公開發售。

你可能會話「PS4 都有中文版啊,而家先出 Switch 中文化會唔會太遲啊?」我又唔係咁認同架,《魔界戰記 5》係一隻非常多元化嘅戰棋遊戲,關卡多、任務多;而想刷錢、刷技能或者刷 Lv,都需要玩家投放大量時間心機去育成角色同埋職業!所以出落手提機 Switch 度的話,對於唔係好多時間打機嘅朋友黎講(舉手)相信係好消息啊~

《魔5》嘅故事背景,簡單黎講,就係魔界大戰!魔界入面有分唔同種族部落同勢力,今集嘅 Boss 魔帝「暗邪沃伊德」到處侵略魔界,男主角奇力亞就挺身而出想對抗魔帝;女主角雪拉菲娜係魔界富二代(笑),原本被父母許配比「暗邪沃伊德」,因為厭惡呢個安排所以離家出走,結果一次危難中被奇力亞所救。故事就係以兩位為中心。

不過遊戲重點,畢竟係「戰棋系統」嘅部份,所以劇情同對白都係輕鬆帶少少惡搞中二成分為主,絕對唔會出現啲咩悲壯嘅場景……或者因為遊戲著重嘅,係「趣味」嘅部份,所以無論係人設、對白、劇情,偶爾都幾無厘頭的 LOL

例如女主角雪拉菲娜成日見到男主角同異性就想媚惑人地,我明官方係想將佢打造成「小惡魔、魔性之女」嘅呢種形象,不過正因為大部份人物角色嘅性格太過個人主義,我反而唔係好感受到呢班人之間嘅牽絆喺邊度……

如果唔係太介意人物關係圖、淨係想專心打戰棋遊戲嘅朋友,就絕對會享受呢個 Game 啦(笑)!《魔5》嘅關卡極多,淨係要打爆一輪都需要唔少時間;加上 Switch 版係會免費收錄 PS4 版所有 DLC 的,而關卡入面,又會好似《機戰》咁有 Bonus 條件可以解鎖;同時,遊戲入面仲可以接好多任務需要打關卡時挑戰……如果你目標係想挑戰 100% 完成遊戲嘅朋友,我諗你日煲夜煲都要玩一段長時間,超抵玩!

點解話係初心感想?因為我目前淨係玩咗頭二十幾關(中途掛住刷任務同埋升角色,打黎打去嗰幾關 LOL)

戰鬥方面絕對係遊戲嘅重點!我本身唔係戰棋遊戲嘅愛好者,淨係有玩開《機戰》系列;不過,當然我唔會拎兩者黎做比較啦(笑)《魔5》喺 PS4 上推出時其實我都有玩過,但係始終唔鐘意用大屏幕黎玩非動作類遊戲,所以好對唔住咁中途棄 Game;不過而家用 Switch 玩,我反而有心機玩咗好多(我係幾乎唔會插 DOCK 連 HDMI 落 MON 玩嗰種人 LOL)

唔知大家有無同感呢?我覺得用手提機玩呢類型遊戲嘅時候,感覺更有凝聚力,簡單啲講句就係更易一眼關七,可能係心理因素影響啦……

畫面方面就無話有咩改善,因為 PS4 版時已經做得唔錯,動作或者指令操控都好流暢;而角色武器、技能等要素,都係需要日積月累嘅戰鬥去提升戰力的。角色有分近攻、遠攻、魔攻、治癒系,職業多到好似打 OLG 咁(笑)

唔同職業同等級,亦會影響戰場上可以移動嘅格數、或者攻擊範圍有幾遠。例如忍者,可以一口氣跳上高處、移動距離亦遠;而主角奇力亞,力量雖大,但係移動距離一般;要點樣善用角色嘅優劣之處、去發揮同一回合裡面最強嘅攻擊 COMBO、同時又要考慮敵人嘅招式同埋移動距離,以減少我方最大傷害值……呢個或者可以話係遊戲中,玩家比自己最大嘅挑戰。

特殊技都會有過場動畫

輸出最多嘅角色可以獲得 Bonus EXP

頭先提過 Switch 版有齊哂所有 DLC,除咗任務多咗之外,對於初心玩家黎講,最大好處絕對係:
(1)會有初始能力較強嘅角色可以使用
(2)獲得大量金錢作為初期儲備(可以買裝備、醫療角色、或者招兵買馬搵新角色加入隊伍)

不過有錢都唔係萬能,角色如果想學新技能,就要多上戰場殺敵,先會儲到個人技能點去換取/升級技能……而當時我有朋友玩《魔5》啲角色係升到上 200 幾 Lv 的 LOL 我只能講:要稱霸呢個遊戲嘅道路真係好漫長!

Switch 版而家已經有繁體中文版,雖然大家上文可見我嘅截圖有部份係日文,不過呢樣只係我個人喜好而已,同埋可以比較一下中日文兩個版本文字表達嘅分別!繁體中文版嘅翻譯做得唔錯,睇中文對白依然不失日文原文嘅趣味性,呢一點要讚。

雖然我離稱霸遊戲仲有一段好長嘅路,希望呢個初心感想,仍然能夠簡單同大家介紹到呢個遊戲嘅特色!買黎隨時有空時輕鬆一玩,絕對係一個唔錯選擇:)

最後附上遊戲的 Switch 中文版 Trailer:

About 神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

Connect

Connect on Facebook View all Posts