VJGamer 嚴選 2017年度五大最伏遊戲

2017年話咁快就過啦,黎到年尾又係時候數下今年有咩正 Game 又有咩伏野啦,今次就先黎五大最差遊戲,即管睇下我地 VJGamer 編輯部同大家係咪一齊中過同一隻 Game 伏!

 

2017 年度五大最伏遊戲 By 森麻 (排名不分先後)

  • For Honor
  • Vikings: Wolves of Midgard
  • 巨影都市
  • FIFA18 (Switch版)
  • ARMS

 

感想:

先講 For Honor,其實隻 Game 本身 idea 去到單對單對戰等等都係好出色,但係出事係玩法以及升 LV 系統上面。遊戲想行 MOBA類型三路進攻,但係得一路有兵又無埋伏路線,此乃一大敗筆。再者官方開新職你想玩就要 1LV出去打人地滿LV齊裝……真係你玩埋佢啦,希望 2018年改版會有大改善。

另一隻 Vikings:Wolves of Midgard 係一間細廠參考 Diablo II 做出黎既作品,整體都算水準唔錯既,之但係遊戲內存在極多 Bugs,例如進行主線任既存送門可以完全唔見咗,解決方法就係 Delete Save 由頭玩過,大佬咁我點撐你阿? (到今日官方仲未有任何 Patch Fix)

巨影都市就絕對係伏到核爆,大家都諗住係絕體絕命都市+各大作品 Crossover 既勁野黎,點知一切生存要素,探索等等完全欠奉,故事方面我直頭懷疑係無劇本添!終於明白點解隻 Game 事前係無遊戲 Gameplay 畫面出街。

老任自家製既 Arms 係對戰部份尚算 OK,但係同樣地犯咗模式沉悶呢個問題,加上最大既賣點體感對戰係香港地黎講…….個個都唔係好想郁既情況下,  不受歡迎都係意料之內。

去到最後 FIFA 18(Switch版) 基本上都出晒名係今年最伏,極多 Bugs 加上官方既處理態度 (EA) 令到隻 Game 係二手區都無人敢接咁滯,唉明明係 PS4 / Xbox One 係一隻好 Game 點解唔好好地整埋隻完整版落 Switch呢…….

 

 

2017 年度五大最伏遊戲 By 神婆(排名不分先後)

  • 蒼藍革命之女武神
  • 軒轅劍穹之扉(PS4)
  • Vikings: Wolves Of Midgard
  • Akiba’s Beat
  • SINoALICE(iOS / Android)

 

感想:

等我順上面次序講啦!SEGA 嘅《女武神》系列第一集明明幾好玩,所以我本身對《蒼》呢個外傳都幾有期待;奈何真係開 Game 之後……畫面質素一舊舊、戰鬥模式死板單一,作為一個 RPG,劇情居然要下下靠手動接任務黎推進,而啲任務本身又非常類似,都咪話唔悶。角色之間無互動元素,探索場景又少,感覺上實在太似一個未完成嘅遊戲了……

至於《軒轅劍》PS4 版……即係咁,自從開發商大宇賣身比大陸之後,新《軒轅》又好《仙劍》又好,個劇本都令人慘不忍睹;今次《穹之扉》個劇本無感動、無深度,夾硬以唔成熟嘅技術將個遊戲推上 PS4 嘅後果,絕對係加倍自曝其短,畫面材質、角色怪物模組貼圖粗糙,動作生硬,戰鬥系統除咗垃圾,我都唔知用咩字眼黎形容好喇!《軒轅劍》已死,大家都係懷念過去算了~

隻《Viking’s》我就同總編森麻一齊玩嘅,一開始覺得唔錯,有 Diablo 味道吖;但係最後有 Bug 搞到我同總編兩個人一齊卡關……有咩感受?請轆返上去睇森麻嘅評價啦(笑)

《Akiba’s Beat》我玩咗兩章節就想碟棄 Game!本身我喺 PSP 年代有玩過《Akiba’s Trip(秋葉原之旅)》,當時呢隻小品遊戲做得極為好玩;點知去到 2017 年,開發技術應該有更好發展架?但係,戰鬥模式沉悶都算,到底你係想做節奏遊戲,定戰略遊戲?定位模糊令我黑人問號!加上,估唔到黎到 PS4 之後,遊戲中可以玩嘅場景仲少過 PSP 年代;路人以前個個有樣,點知《Beat》入面變哂紅綠黃淨色嘅剪影咋!大眾臉都唔比你呀!唔怪得隻 Game 出咗之後,日本根本無人提啦……

最後忍唔住講隻手機遊戲《SINoALICE》,呢隻 SE 出品嘅遊戲見證咗乜嘢係「雷聲大雨點小」,喺事前登錄期間,不斷打住「之後會有 Nier:Automata 嘅 Crossover」嘅旗號,令到好多玩家都充滿期待;但係開 Game 之後,起碼有一個月,個 Server 唔係 Keep 住維修、就係入唔到 Game;就算入到 Game,每五場戰鬥就有三場係彈 App 嘅!至於個同其他玩家合作對戰嘅鬥技場,拖咗幾個月先開到……係呀,個 Game 畫面係唔差呀,戰鬥你當掛機 Play 啦,不過我忍耐咗兩個月就棄咗 Game 了,而家就算改善咗我都唔會想回坑架啦……

 

 

2017 年度五大最伏遊戲 By 阿九(排名不分先後)

  • For Honor
  • ARMS
  • Super Bomberman R
  • Prey
  • RO 仙境傳說:守護永恆的愛

 

感想:

《For Honor》 的確喺創新上行前好多步,雖然明確地以電競方向出發,可惜遊戲嘅門檻唔低,而且要玩家消耗大量遊戲時間去將角色成長、打裝、抽裝,要由比人強姦十幾次先可以有啲好轉嘅狀態下,做乜要咁辛苦自己。

《Super Bomberman R》 係好多第一水出NS嘅玩家特意要買嚟回味嘅作品,但可惜連玩家最想有嘅騎寵拉蛋都冇,而且又係一隻為左拉長玩家遊玩時間而限制可用版圖同角色,要玩新野就喺遊戲中儲大量金錢去買新地圖,而且網絡對戰連線問題始終成為玩家詬病嘅原因。

《ARMS》體感宣傳就無敵,但體感遊戲始終要係Party Game先可以有多少少生存空間。最終原本嘅拳擊模式被其他小遊戲搶風頭,最終又係因遊玩模式少而樂趣急速冷卻。

《Prey》 作為一隻科幻驚慄第一身射擊遊戲,佢最稱職嘅就只係外太空嗰種無重狀態下嘅孤寂,但遊戲中喺外太空嘅時間其實唔多,主要喺太空站當中走嚟走去解謎殺怪同比怪嚇,當去到探敵道具之後連嚇你嘅感覺都無埋,隨之而來就只係沉悶嘅重複。

《RO 仙境傳說:守護永恆的愛》真係消費玩家對RO嘅愛,以前玩RO最大問題就係外掛太多,變成掘礦遊戲,依家直頭官方比埋自動打怪你掛網,之後仲有大量玩完帳號被盜問題未解決,之後再有RO新作都真係聽到都怕怕。

 

 

大家既 2017年五大最伏就係咁先,好快我地就會出埋十大最佳遊戲,敬請期待!!

 

About 森麻

VJGamer總編 (毒撚),歡迎投稿

Connect

Connect on Facebook View all Posts