【開創刺客新紀元】集 Ubisoft 大成之作《Assassin’s Creed Origins》遊戲評測

早幾集出到無乜大驚喜既《Assassin’s Creed》系列靜思咗一年之後重新推出既《Assassin’s Creed Origins》(下稱ACO),我地試玩過之後發現呢隻 Game 係極唔簡單,完全係吸收咗 Ubisoft 其他系列作品既經驗黎做呢隻遊戲,咁到底集各家之大成既 ACO 有無辦法省靚返招牌呢,立即同大家剖析一下!

 

非常特別既畫面表現

循例都要講下畫面點,隻 Game 既畫面表現就 …..er…..非常特別,絕大部份既情況畫面表現非常細緻,尤其水既表現極真實!但係又會巧妙地係某啲位又做得比較粗糙,例如山石既材質等等,不過整體黎講都係屬於上乘!

呢啲位做得好靚

水既表現仲做得好好

山石材質就有少少hea

人物面相係另一個問題

No need, Thanks

整體黎講都係好出色 (不過個樣真係好似奧巴馬)

 

龐大而又細心既劇情

劇情黎講今集舖排非常之用心,要刺殺既目標s環環相扣呢啲簡單野就預咗,但係去到尾段劇情除咗帶出兄弟會既起源之外仲扭橋去玩第二樣野 (太狗血唔劇透),完全無 Hea 交功課真係非常之抵讚!

除咗主線任務之外,用十二個星盤任務黎描寫主角巴耶克同佢個仔之間既感情亦都非常高章,完全唔會有令人突兀既感覺。當然唔少得豐富既支線,充分咁刻畫出相關人仕周邊發生既事,最正係唔會交完任就當完結事件,即使你已經完任但係 NPC 係會有既定既模式去發展後續劇情。舉例有個任務係要你係敵方軍營去夾個將領出黎,只要交將領去指定地方就算完結任務。但係你八掛跟住啲 NPC 既話會發現佢地會的個將領去後巷係咁打佢要佢講出機密情報,連呢部分都做埋的確非常之細心!

同個仔之間既父子情描寫得幾好

探索任都有非常用心,搵晒線索之後會重組案情!

你以為係無關痛癢既訊息,其實係帶出緊當時社會發生緊乜事

現代果 Part 仲要有彩蛋,係枱上面既電腦內一份檔案記載住《Watch Dog》主角經歷既事件,可見 ACO 同《Watch Dog》係同一世界觀

 

極出色戰鬥系統

以往既 AC 戰鬥都係反擊無雙咁滯 (最近呢2集有改善),基本上集集都大同小異,之但係黎到 ACO 就好明顯見到 Ubisoft 吸收咗《For Honor》既經驗並且將成套系統融入 ACO,例如當中既檔格、反盾、閃避等等都極有《For Honor》味道,係差在未有招出咋!成個戰鬥系統豐富咗一挑幾已經好有 feel,而且加入埋附加火、毒、出血等狀態既武器令到戰鬥風格更多元化,話佢係系列戰鬥系統最佳作絕對當之無愧!

今集戰鬥系統係極之好玩,對人戰只係最簡易既戰鬥,打戰象同神先考功力!

一般戰鬥以外仲會有船戰,刺激好玩!

遠攻有普通射箭、投石機

 

仲可以加速撞向對方船身並且掉火焰彈 Combo!!

同《Far Cry》一樣,可以放籠內動物出黎咬人

常規戰外仲有Boss戰,圖為同讚岐大蛇打緊

係水中同鱷魚打基本上係死硬,可以見到製作組既用心

當然有鬥技場玩啦!

不得不提就係戰鬥前點都要用隻鷹幫你 Mark 啲敵人同寶物係邊,呢部份亦都極有《Watch Dog》無人機既味道!

 

 

收集系統引入人勝

除咗要儲唔同類型、屬性武器之外,大家熟悉既袖劍、箭筒同護甲等等都有得升級,不過就唔係舊時咁升級而係好似《Far Cry》咁要自己去打獵儲素材升,仲有好似鐵、木呢類素材就需要打劫路過既土匪商旅又或者同商人買到,有時係收集過程仲會遇到鱷魚王、河馬王咁,非常有趣!

成功討伐鱷魚王!

護甲箭袋甚至係袖劍都要升級

有每日任可以拎到紫或者金武

打到咁上下武器唔夠力就可以去鐵匠度 Upgrade

當然仲有必勝大法……課金

 

 

刺客多方向養成

加咗技能樹之後大家養出黎隻人都唔多少有啲分別,有啲鍾意玩純遠攻有啲鍾意玩無雙,想點玩就點玩,自由度極高!

多姿多采技能樹

 

超豐富探索元素

ACO 有超大地圖比你周圍行,有大量古墓比你扮 Tome Raider,最好玩既仲有樣叫莎紙謎題,搵到張紙之後上面會有謎面提示你去隱藏既地點尋寶,而且謎題仲幾有水準添!

有得扮玩緊古墓麗影

 

總結

重新出發既刺客令我非常滿意!

集 Ubisoft 各遊戲既大成,包括《Far Cry》打獵元素、《For Honor》對戰系統、《Watch Dog》無人機系統等等,並無舊酒新瓶感覺,反而令人覺得處處精彩。
遊戲亦都巧妙地用主線劇情控制節奏,當你打到咁上下就會轉一轉口味比你驚喜一下,例如船戰、賽車、鬥技場等等。

當你封頂40級以為自己天下無敵時,官方就安排新任務比你玩。好似啱啱完既阿奴比斯任就係單挑極巨型 Boss,極有 Dark Soul 味道,辛苦打完之後更期待想挑戰下一隻。

當然都有部分小問題例如 Loading 時間有少少長又無得 DL 西班牙語音 (唔知有幾多個痴線佬好似我咁),但係 ACO 整體都屬於極上乘之作,希望 Ubisoft 可以 Keep 到呢個水準製作更多 DLC 同續集黎玩啦!

 

評分:9 /10

製作組仲極照顧貓奴感受!!

 

回帶相關文章:

【讀者投稿】Assassin’s Creed-Origin – Ubisoft 一如以往的沉悶

 

About 森麻

VJGamer總編 (毒撚),歡迎投稿

Connect

Connect on Facebook View all Posts